القصة بدت من يوم السفر من الكويت يوم ياني صالح الله يخليه حق اهله يودعني بالمطار, انا الصراحة كنت متفائل من السفرة وقلت كلها جم ساعة واكون بامريكا. وقت الرحله قرب ومحد ظهر من شباب كلية الهندسة وكلية الحقوق, معذورين لو انا مكانهم كنت كليت المخده ونمت, مو هذي قضيتنا المهم اني طلعت الطيارة بعد ما ودعت الاهل بس اللي خرعني الضابط اللي شاف جوازي وفي ضرف ال I-20 عطاني الجواز وقالي الله يعينك!!
ليش شصاير… في شي…هذا اللي دار بمخي وقتها, كملت وصعدت الطيارة ولاجنه صار شي, طبعا تفاجأت بان كل اللي كانو بالطيارة للأسف هنادوه .. اقولها وانا متحسف.. تقعد معاهم 6 ساعات بطيارة وحده… لا حول الله
بس الحمد الله, الله ستر ومحد كان قاعد يمي بالطيارة, الرحلة كانت على الخطوط الجوية الكويتية الناس يشتكون منها بس المساكين ماشافو اللي انا شفته بالخطوط الامريكية تدرون بعد اهل الكويت مدلعين !!
طارت الطيارة واللي صج ونسني التلفزيون, حاطين برنامج عجيب تقدر تختار تسمع اغاني او قران او تشوف افلام …..الخ انا قزرتها بالبداية على الافلام ويوم خلصت سمعت قران ونمت …….ZzZz….
” بعد 5 دقايق سوف نهبط في مطار هيثرو… درجة الحرارة خارج الطيارة ؟؟؟ والتوقيت ؟؟؟” طيارنا الحبيب صفط الطيارة ونزلنا ووقتها بدت المعاناة اللي استمرت يومين!!!
طبعا انا نازل ترانزيت وبطلع نفس الطيارة لي نيويورك, لقيت وحده بنهاية الممر تفول اللي بروح نيويورك ياخذ هذا الكرت ويرد عند البوابة ؟؟؟. وين هالبوابة والساعة جم نرد ووين نروح كل هذي اسأله ما لقيت لها جواب الا بعد ما ياني ذاك الشاب الهندي وسألني نفس الاسأله وبعدها مشينا مع بعض ندور البوابة….. مطار هيثرو….. والتفتيش…..
بعد ما مشينا بممر طويل وصلنا لنقطة انفصال طرق, بس الهندي ما قصر قرى الاشارات ودلانا, وقفنا بالدور حق التفتيش, حاطين تلفزيون يقولك افصخ اي جاكيت او حزام او اي قطع معدنية …… الخ حتى تكرمون الجوتي فضخته واللي عنده جنطه ما خلوا فيها شي الا وطلعوه حتى الملابس الداخلية ( النسائية) ما علينا .
مشينا داخل المطار مكان السوق, انا شفته الصراحة مثل مارينا بس داخل المطار. لقينه البوابة ودخلنا الطيارة على طول ما قعدنا اكثر من 15 دقيقة بالمطار وطرنا الى نيويورك.
بالطيارة الهندي خلاص اعتبرني رفيجه وقام يسولف وانا مثل ال…… مو فاهم ياريت يتكلم انجليزي الجلب قام يدمج هندي وانجليزي ويوم اكلمه ما يفهم الصراحة اذاني.
وصلنا نيويورك نزلت وخلصت شغل مكتب الهجره بكل سهولة وخذيت الجناط ورحت على طول على مكتب الكويتية بالمطار احجز فندق لأن طيارتي اليوم الثاني, انا اللي فهمته منه انه قالي روح انطر الباص وين مادري سالته اي فندق قالي هوليداي ان. طلعت من المطار ولا تشوف شصارلي انا قلبي رقع, الصراحة اليوم الوحيد الي تحسفت اني خليت الكويت وسافرت.
الدنيا ليل والناس رايحه راده بالشارع وانا ناطر , الناس قامو يقلون وانا يزيد خوفي مع كل واحد يمشي, قمت اخز كل واحد يقرب صوبي. الوضع كان صعب احاول ادق على اخوي اعرف منه وين اروح بس ما يرد , سألت الامن قتله وين باص الهوليداي ان ينطر قالي مكان ما انت ناطر. طال الانتظار الى 7 دقايق, والحمد الله قدرت اكلم اخوي وقالي شنو اسوي وخلصت شغلي ورحت الفندق بباص فاضي مافيه غيري والسايق اللي طوله مترين 
وصلت الفندق طلعت الغرفة وزعت البقشيش ومددت على السرير وانا مرتاح اني خلصت نص الرحلة بس يومها ما كنت ادري اني للحين ما شفت شي…!!!
كلمت الاهل وخذيت دوش وكان باجي 6 ساعات على الطيارة وطبعا لازم اقعد قبل الوقت ب ساعتين يعني الزبده اني بنام 4 ساعات بس, والله حطيت راسي ولا المنبه يرن ما حسيت بالنومه كنت حدي تعبان, زهبت الجناط ونزلت طلبت تاكسي الساعة 4 الفجر, وصلت مطار نيويورك (لجوارديا) دفعت وزن زايد على الجناط ما حبيت افضي اللي فيها تدرون شباب الكويت عندهم الدفع اسهل شي..
باجي ساعتين على الطيارة وانا مخلص شغلي… رحت كليتلي سينابون من كافيتيرت المطار وبعدها رحت تفتشت قبل لا ادش الطيارة كالعادة ادري شنو يبون قمت افصخ كل شي لوول (العن ابو التفكير الوصخ)
ركبت الطيارة والكل يخزني طبعا كلهم اجانب وبالاحرى انا الاجنبي بالنسبة لهم… تدرون وين قعدت!! اخر كرسي وره صوب المحرك والطيارة صغيرة ( هذي الامريكية ) لا تلفزيون ولا راحة وصوت المحرك بط اذني وانا متحمل قلت مو مشكله كلها 4 ساعات واوصل شيكاجو…… يمر الوقت والطيار قام يستعرض بالمطار يفتر ويفتر صارله بالظبط نص ساعة واهو يلعب.. وبالاخير قال ” ناسف للازعاج بس الصراحة الاجواء بين نيويورك وشيكاجو ما تسمح بالتحليق فاللي عنده اي شغل هناك مستعجل يأجل مواعيده باستخدام التلفون او الكمبيوتر… ووقت الاقلاع المحتمل بعد ساعة!!!” واحنا ناطرين بالطيارة ساعة يرد ويقول للحين الاجواء مو زينه سوف نظطر ننطر بعد ساعة !!!!!!!!!!! نطرنه وكل واحد قام يتحلطم وانا صابر…
واخيرا طرنا بعد ساعتين انتظار داخل الطيارة, بس انا لاحظت ان الرحلة طولت يمكن الطيار ماخذ مسار ثاني وقتها حسيت بنعمة الكويتية واهمه حاطين التلفزيون تشوف فيه كل شي.
مرت اربع ساعات وطيارنا يتكلم ويقول ” سوف نظطر نهبط في مطار قريب من مطار شيكاجو لأن البانزين بدأ ينفذ !!! وانا وقتها كنت خايف طوفني طيارة شيكاجو - توسان بس بعد ما قال هالاخبر انا خلاص قلت لا بالله كدينا خير..
نزلنا وعبينا وتعرفت على اللي قاعد يمي طلع يشتغل بالسفارة الامريكية بالكويت (شغل عدل) قعدنا نسولف ونسولف خلاص ربع ويوم نزلنا مطار شيكاجو انا هني مادري شنو بسوي وين اروح طيارتي طارت قلت خلني اروح مكتب الامريكية واقولهم السالفة… ما قصروا عطوني تذكره ثانية بعد ساعتين.
وانا هناك شفت الحبيب اللي معاي بالطيارة رحنا مع بعض عزمني على بيبسي وصمونه المهم بعدها كل واحد راح لحال سبيلة ينطر طيارته… مطارات امريكا كل مطار غير الثاني نهائيا.
انا لقيت طيارتي ونطرت مع الناس ( الحشر مع الناس عيد ) اشوف طولو … ليش… والمضيفة تنادي على اسامي اخر نداء لهم وانا اقول بقلبي شفيهم هذوله ناسيين طيارتهم لووول ماتدرون شصار!
وقتها قلبي نغزني قلت خلني اقوم واشوف لوحة الرحلات مره ثانية… ولا انصدم ان رحلتي (now boarding) شيت يا ريال طيارتي بطير وانا ناطر مع الدور الغلط… طلع في رحلتين يم بعض بروحون توسان وبعدها عرفت ان اللي نادوهم انا كنت منهم لووووووووووووووووول بس الحمد الله لحقت على الطيارة. وطرنا ووصلنا توسان بعد 4 ساعات بس الجو كان حاااااااااااار وواحد من الشباب استقبلني هناك ورحنا فندق الماريوت خره عليه غااااالي الليلة ب 200 $
قعدت يومين وطلعت اخوي ياني من ولايته بنهاية الاسبوع عشان ادور شقة بس اول شي رحنا عن رفيج اخوي قعدنا عنده جم يوم لين ما احصل شقة وطبعا الاخ العزيز ما قصر اجر سيارة
شرايكم بالسيارة لووول
هذا انا قام نعبي بانزين لووول
ونسيت اقولكم ان رفيج اخوي الصفار يعرف يطبخ ما قصر طبخلنه معكرونيه امممممم
وطبعا انا بعد ما لقيت الشقة شريت تلفزيون تدرون بعد قاعد بروحي بالشقة لازم شي يسليني
تعرفت على شباب كويتيين وايد واللي معاي بالكلاس 5 هذا واحد منهم ..
الجامعه الصراحة عجيبة المدينه بكبرها جامعه كلها طلبة بكل مكان
وهذا مبنى الوناسة بالجامعه, فيه مطاعم وشغل عدل
ترقبوا المزيد من الصور من شاب توسان…..
..
