Posted on April 7th, 2006 at 10:10 pm by A.I.M
وكالمعتاد وبحلول يوم الخميس بدأنا نتناقش لفترة طويله على الطلعه وكنا لأول مره
عشان ما اجذب اهيه الصراحة ثاني مره نقرر الدراسة بستاربكس وطبعا راسك الحين بقولك شنو الدراسة هذي اللي بستاربكس
والله احنا كيفنا ندرس بستاربكس بستار اكاديمي والله كل واحد حر …
المهم انا يوم الخميس وكل خميس من اول ما بدا هذا الكورس اروح المعهد من الساعة 7:30 الصبح لين 12:30
اتفقنا ان ماجد ييني الساعة 12 المعهد ونطلع من هناك مكان ما نبي المهم انا الحين قمت من النوم ورحت المعهد ودقت الساعة 12 ومثل ما قالي ماجد قعدني الساعة 12 بس كان الوضع ما يسمح كان المدرس احم احم الدكتور قصدي 
يشرح وانا ما اقدر ادق شسوي شنو الحل ولا اقول خلني اتصل واخلي التلفون بالدرج واسمع توت توت … توت توت محد يشيل
وبعد برهة من الزمن قام الوحش ماجد ورد بعدين سديته بويهه بعدما تيقنت انه قعد وتمر الساعات ….
وصارت الساعة 12:30 وانا مستانس وتعبان في نفس الوقت اتصلت بماجد ( ها وينك ..؟) قالي انت روح ستاربكس وانا اييك هناك ( اللي يسمعه يقول الولد عنده سياره ) طبعا خذيت تاكسي وطلع كريم ودفعت اللي ابي وقعدت انطر ماجد وانا اترقب الباب
ناس طالعه وداخله طالعه وداخله ….. واخيرا وصل. قعدنا نسولف شوية طلعت الجنجفة حبيت العب على راس ماجد وأسويله سحر بس الجلب قام يتفلسف علي لين ما كشف السحر ( لا تخافون اعلمكم اياه بعدين في موضوع قادم بالصور بعد )
كنت في امس الحاجه الى الاكل وماجد كان في امس الحاجه الى النوم قررنا ناكل وييييييييييييين
طبعا بروبي تيوسداي كنا داشين المحل وناويين نقط بو عشرين دينار على الاكل لوول
قعدنا وطلبنا انا عن نفسي طلبت (chicken parmesan) كبييييييير وماجد مادري طلب همبرجر + ستيك
نطرنا الطلب وفي لحظات وصل وياريته ما وصل تقدمت النادلة وفي يديها الطبق واللعاب يتدفق من افواهنا وفجأة وإذا بنا ….(يتبع)
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
مالي خلق اسوي موضوع يديد قلت خلني اكمل عليه واللي مو عاجبه ……….
so وإذا بنا ….. نسيت شنو كنت بقول لوول اللي صار انه احنا كلينا الوجبتين على خير ودفعنا الحساب قصدي ماجد دفع لوول
وطلعنا واحنا نترنح ونتمايل وكل واحد ايده على بطنه ماجد كان ناوي يمشي بس انا رفضت وبشده ومع فوتونات الشمس الحارقة
دخلنا ستاربكس مره ثانية بس هالمره غير كل مره طبعا قعدنا وخلني اشبهلكم الموقف بمثال ( يوم تخظ قووووووووووطي بيبسي
وتبطله شنو يصير ما انصحك تجربها ) احنا كنا على وشك الفوران ومن كثر الكبت وتدعيس الاكل في المعده حصل تداخل بين الامعاء الغليظه والهيبوثلامس نتج عنه منع المخ من ارسال المسجات لووول الى اعضاء الفم فنتج من ذلك اشخاص لا يستوعبون كل واحد الحنج عنده يبيله لك بمعنى ثاني الفيوزات اختربت …. وما ادراك ما الفيوزات !!
قعدنا نسولف ونسولف نستعبط ونظرط على الرايح واللي ياي وتلفوني ما سكت من اول برهه طبعا دي جي شغال ( مو مثل بعض الناس كاااااااك ) ماجد يقولي قوم ندرس اقوله بعد شوي طبعا المنظر كان صعب والجو كان عجيب واليوم ما يتعوض فقتله انطر بعدها بساعة … قوم يا ولد خلنا ندرس , خلنه شوية بعد المهم لين ما صارت 6 طلعنا الطابق الاول وقعدنا ندرس …
بروح اتغدى yum yum (يتبع)…
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
درسنا وخلصنا بعدها بساعة تقريبا بعدين طلعنا نتمشى شوي وطبعا ماجد ما قصر قال خل نتمشى على البحر وانا زي العبيط وافقت ومشينا بعدها قال خلنا نروح برجر كينج هناك في قعدات حلوه قتله اووووووله شيودينه هناك وشلون بنرد لازم ناخذ تاكسي المهم مشينا وكل واحد تناوب على شيل الجنطه لمدة 5 دقايق على طول الطريج تخللها قز طبيعي مع معاكسات شماليه غربية, وصلنا برجر ونطرنا بعدها بشوي قررنا نرد البيت قمنا ندور على تاكسي بدون جدى نحاول مني مني ماكو فايده قلنا خلنا نروح شارع المطاعم يمكن نحصل وطبعا كان هذا راي ماجد الجلب رحنا ونطرنا نوقف تاكسي ونقوله المكان المطلوب يقول ما أقدر شكلنا سفاحين مثلا بس الجو هناك كان غير طبيعي .. كان على غير المعتاد قز عيني عينك من صغيرها لين كبيرها ولا ومن منو بعد من البنات ذات انفسهم ضلينا ساعات وسيارات تذهب بلا إياب, كانت فكره خره وخربت علينا اليوم كله ولكن هذا ما منع ان احنا ضحكنا وفصلنا على اشياء ما تسوى تدري بعد التعب يسوي العجايب انا كنت واصل حدي الباور عندي صفر وما اقدر اكمل ماجد يقولي خلنا نرد الفنار قريب وناخذ تاكسي وانا زين اني ما ذبحته قتله انطر على شارع الخليج يمكن نحصل ولكن بدون اي نتيجه تخلل اليأس إلى اعماقنا ونفذ الصبر من عاتقنا وكبّل الهم ارجلنا صرنا كا(توووت) في شوارع الكويت
لا ادري ماذا كان يرد في اذهان من يرانا, صرنا ملطشه لا ادري هل من سيرنا ام ان شباب الكويت قد تأصل فيهم هذا الطبع الزق
الكلمات لا تستطيع ان توصف العبرات لقد كانت لحظات اشبه بلحظات الموت فكنا أشباه اموات ولكن مازلنا احياء ( لا كيمياء لوول)
من كان السبب هل صديق ام سفيه ذو عقل عقيق, قد تخترق الكلمات صدر رفيق ولكن في يومها كان المجهود معصر الألم والتعب .. وقد آل بنا إلى موقف الباصات ننتظر ومضة أمل تعيد لنا جوهر الحياة . انتظرنا فترات وانا اقول ترى يمدحون الباص هابين عليه هالأيام يوصلك وين ما تبي بربع دينار لوول بس ما توصل الا بعد باجر , ومن الطريف في الأمر واحنا قاعدين على الشارع يانا واحد مصري على الأرجح صعيدي متنكر لوول يقولنا : انتو رايحين فين ؟!؟
ماجد قاله خيطان صوب شارع النادي والأخ يقولنا دحنا بقى في نفس الطريق ناخد تاكسي واحد يوصلنا وانا وبسرعة قتله بس انا رايح القرين ولا يقولي خلاص احنا ناخد تاكسي وانت خد واحد تاني انا من ساعتها محتقر هالريال يعني انا وماجد ربع ويي هذا ويفرقنا ومن بعدها ما توفق بعد ماقال كلمته ولقينا ركض على الشارع الثاني لأنه شاف باص شك انه بوصل خيطان وانا اقوله اللللللللللحس , احنا بعدها خذينا تاكسي وبالصدفة طلع واحد كنت راكب معاه قبل كان موديني القرين ( والله الكويت صغيره)
المهم واحنا بالطريج شفنا الصعيدي نازل من باص الظاهر انه ما وصله لوووووووووول وقمنا نضحك عليه ضحك, عشان يتعلم شلون يتعامل مع الناس واحنا بالتاكسي حل الهدوء ارجاء السيارة وبدأت عيني تنادي بغلق الجفون وطبعا نمت شوية وماجد كان صاحي مترقب الوضع وما ان وصلنا نزل ماجد من السيارة وانا رحت بيتنا في رحلة جديده و الباجي معروف ….
هذا اليوم لو اقعد اكتب فيه سنه ما اخلص كان صج صج يوم من العمر يوم شهد الكثير من الضحك والحزن جمع بين المذاكره واللعب وازن بين السير والجلوس ولكن كان يوما شاقا والسبب كان وراءه شخص يتغنى بالبراءة ولكن الشرر يتلاعب في جوفه شخص ملأ الدمع عينيه واخ لو تعلم ما بها من غدر, يسير بجانبك وهو في الحقيقة يرجع للوراء يأخذ بيدك وان كان في الأصل يسحبك الى طريق التعب … ( بالغت شوي لوول )
ملحوظه: يرجى من قارئ التدوينه عدم تصديق كل ما قلته عن صاحب الحاجبين الغليظين لأني كنت مبالغ فيه شوي بس همن كل اللي قلته ما يبرد قلبي اللي صار مو شوية انا تعذبت والشكوى لغير الله مذلة
~~~~*( A.I.M )*~~~~~