الأحد .. الأثنين .. الثلاثاء . .الأربعاء .. الخميس ..

5 ايام .. مرت .. حصلت وايد تغييرات .. جذرية .. واقعية .. حياتية .. لول ادري فليتها بالحجي ..

يوم الأحد .. سجلت لأختبار القدرات الأكاديمية بجامعة الكويت .. طبعا روحة الجامعة كانت فلم هندي بسبة الأخ العزيز فوزي بس ما نقول الا الله يسامحه .. لول .. لكن السؤال الأهم هني .. ليش سجلت حق الإختبار .. بصراحة انا اقنعت نفسي انه راح يكون مراجعة مفيدة لنهاية الفصل الأول .. لأني ما عندي نية ادش جامعة الكويت .. و بقدم بعثة خارج الكويت ان شاء الله ..
لكن في لحظات انهزامية .. احس انه قراري بالموافقة و التسجيل لتقديم الأختبار .. كان لرغبتي في دخول جامعة الكويت .. او يمكن لأني مو عاقد العزم على وجهتي بعد الثانوية ..

الأثنين .. صباحا .. طلعنا مع فتيحو ويندوز .. ودانا الجابرية علشان ندش اختبار التصفيات الأولى لأولمبياد الحاسوب هالسنة .. بيكون في المكسيك .. و نفس السنة اللي طافت .. استاذ زهير حطلي كود يم اسمي : 101 .. يعني معفي من الأختبار هذا ..
رافقنا فوزي و عليوي و اخوي بروك .. ماندري شنو سوو .. بس حده حده ودي يسافرون وياي لكن لا حياة لمن تنادي ..
شفت الشباب من السنة اللي طافت هناك .. و وناسة سوالف لين ما خلصوا الباجيين الأمتحان ..

كان مفروض ارجع المدرسة علشان اروح المنطقة التعليمية و اشارك بتشكيل مجلس الطلبة .. لكن الباص هدنا و راح اييبله اكل ..
دقيت على الأخصائي قلتله الموضوع كيك كيك كيك .. قال اخذ تاكسي و تعال المدرسة ..
بيني و بين نفسي .. مالي خلق لا اجتماع ولا بطيخ . .اهد ربعي و وناستي معاهم و كل شي و اروح الأجتماع .. مينون .. لول

خليت فتيحو يدق عليه و يتفاهم معاه .. اخرتها قعدت مكاني و لا رديت لوول ..

شهد اليوم هذاك بعد .. دخولي و فوزي على الناظر .. علشان يوافق على مسابقتنا اللي بنسويها على مستوى المدرسة .. المستضيف الكويتي الأولى .. في مجال تكنولوجيا المعلومات .. المدير .. عطانا موافقة تامة و طلب منا نكلم بو فهد الوكيل .. على نفس الموضوع و كلمناه و خذا نسخة ..

اليوم الثلاثاء .. يوم كئيب صراحة .. مادري ليش بس هذا كان احساسي .. فرحت من شي واحد بس ..
اني خلصت اخر امتحان مؤجل .. كان لغة عربية .. بصراحة نسيت انه علي .. يو عندي نادوني و دشيت الأمتحان .. الحمدلله قدمت وايد زين .. ..

رجعت البيت .. بروح فندق كورت يارد .. الماريوت .. اليوم .. علشان اخذ اغراضي ملوت مسابقة ال ACM
اللي سجلت فيها ..

هذا .. باختصار .. حتى اليوم العصر .. الثلاثاء ..

انتهى ..

ماجد ..

امس الثلاثاء .. انتهت امتحانات الفترة الأولى ..

شناطرين مني .. اقول اني يايب درجة كاملة بكل المواد :|

احم ..

بصراحة .. استهترت ببداية الإمتحانات ..

كان موضوع الثانوية العامة .. براسي طوال بداية السنة .. لين فترة الأمتحانات
سببلي فترة كآبة و احباط .. ابي بس انسى هالشي .. وين ما اروح .. مدرسة مدرسة .. ثانوية عامة .. دراسة .. رياضيات .. فيزياء .. مدرسين خصوصيين .. !!

شالسالفة .. ما تسوى الدنيا .. بس صج حسسوني الدنيا قامت علينا .. كرهت كل ما يتعلق
باللي ذكرته فوق ..

ابي انسى .. اعيش .. يقولون الثانوية احلى ايام العمر .. طل .. زقوا فيني =\ ..

لجأت للهروب . من مشاعري الداخلية .. وين ما اروح .. ما اقدر انحاش .. شبح المدرسة .. وراي ..

اي شي .. يلهيني .. اي شي .. يريحني ..

مرت فترة الإمتحانات .. شهدت اخفاق تام .. حاولت انقذ اللي اقدر عليه .. بعد رجوعي من العمرة .. بعد ما وعدت نفسي بالتغير .. =) ..

انتهى الموضوع .. الفترة الأولى يحاسبونا على 2.5 % .. رحمة .. و ان شاء الله ما تتكرر هالسالفة ..

ماجد ..

رجعنا من العمرة .. الحمدلله الذي اعاننا على اداء العمرة و نسال الله ان تكون مقبولة في ميزان حسناتنا ان شاء الله ..

صادفتني عدة مواقف طريفة هناك ..
اولها كان مع رئيش جمعية خيطان .. ولد الجبري ..

و دار بيننا هالحديث :

الجبري : مرحبا “الكندري” .. تقبل الله طاعتك ..

انا : - بيني و بين نفسي :| - منا و منك طال عمرك ..

الجبري : انت اللي باتحاد الطلبة بالجامعة مو عدل ؟ حاطين صورتك بالجريدة ..

انا : اي - كلش - .. كان معانا لقاء على ما اذكر ..

الجبري : اي صح .. عاد لا تنسونا .. جمعيتكم .. منكم و فيكم ..

انا : افا عليك بس .. تامر ..

بعد مرور 24 ساعة …….

الجبري : قوة الكندري .. ابي رقمك علشان نتفاهم ان شاء اول ما نرد الكويت على جم شغلة ..

انا: هلا ؟ .. انا ؟ ..

الجبري : اي ..

انا : غلطان عمي انا ماجد القبندي ..

الجبري : ما شاء الله .. تشبهه واايد .. ..

انا : اي فعلا .. في ناس قالوا انه يشبهني .. و ناس قالوا انا اشبهه - لول شكو - فعلا .. :p

الجبري : اي وايد تشبهه ما شاء الله .. كلمته امس اهو ويانا ..

انا : اي كلمته .. فعلا فعلا .. - حكومة ما نقول شي - ..

انتهى الحوار .. مسكين .. يقثني اللي يسوي نفسه عارف كل الناس و يبي يمشي شغله ..

خل ياكلها الحين ..

ماجد .. !!

لحظات كتابة هالسطور .. اعاني من التهاب فظيع في زلاعيمي .. زين اللي قدمت امتحان اليوم ..

مشكلة والله .. مبتلشين .. شنسوي بعد .. امرنا لله ..

عالعموم باجر ان شاء الله مسافر .. بروح اعتمر ويا الوالدة ان شاء الله ..

ادعولنا بالسلامة .. و نشوفكم على خير ..

ماجد .. !!

اليوم بتكلم عن محمد سعد .. استاذ الفرنسي اللي ما يدرسني .. لول

الله يسلمكم هذا واحد .. مصلحجي درجة اولى .. ماعنده شغل غير يضبط شغله مع الطلبة ..

ياني يوم الأثنين .. “ماجد عاوزينك تعمل بور بوينت للدرس بتاعنا”

يرحم والديك انا شكو بالفرنسي و ابو الفرنسي و اللي خلفوه .. !!

انا علمي .. ولا لي شغل بالفرنسي لوول ..

لازم نجامله .. شنسوي بعد .. بس هم طلعتها من جبده ..

و سويتله شغل زفت .. على قده لول .. علشان يتأدب و ما يعيدها ..

و اذا فيه خير ياخذ الفلاش ديسك مني مرة ثانية .. “اكتله والله اكتله .. هيجي ذبح” ..

ماجد .. !!

ايمن و بكل جدارة .يستحق لقب عبيط الأسبوع .. او طفل الأسبوع لوول ..

خلال اسبوع كامل .. و ظواهر العبط ماشية معاه ..سواء بالدوام .. ولا لما نطلع . اي مكان لوول

الإبتسامة ما تفارق ويهه طوال الأوقات .. الله لا يغير عليه خوش ولد يستاهل كل خير ..

فصلاته ماكو منها .. يحليلك ايمن .. الله لا يحرمنا منك ..

ماجد .. !!

غبنا و رجعنا ..

خلص رمضان الله يذكره بالخير .. مع اني متاكد انه بعض الناس ما صاموه كله .. !

عيدنا .. ووزعنا عيادي .. و فرحنا و استاسنا و رحنا سينما .. !!

و ردينا للمدرسة .. بس هالمرة غير ..

احساس الواحد بحب الدنيا .. صار سمة غالبة علي .. حبيت الدنيا .. استانست ..

ايام الثانوية يقولون احلى ايام بالعمر .. ايام الشباب .. ايام السعادة .. نتمنى انها تدوم ..

البعض يستغرب .. ماجد فرحان .. عليه بوادر السعادة .. ماجد البيمب يصير جذي .. حبيب ..

رومانسي .. شاعري .. عاطفي .. وجداني .. اقول .. اي .. ليش لأ .. كلنا عندنا قلب .. و نحب ..

و انا ناطر يا حبيبي .. ترجع لي يا حبيبي ..

ماجد .. !!